Te Ao

Ko te wāhanga tuawhā o Te Aho Matua ko Te Ao. Me mōhio te tamaiti ki tōna ao Māori – tūturu, o nāianei hoki. Kia kaua te tamaiti e herea ki te ao kōhatu, me hono te kura i te tamaiti ki te ao whānui. Ko te whāriki o te marautanga ko ngā uaratanga o te ao Māori e ārahi ana i te tamaiti ki te matapihi o te ao whānui.

Ka pū te ruha

Ka hao te rangatahi

Te Ao

4.1 Ko tōna ake kāinga te ao tuatahi me te kura timatanga o te tamaiti. Tua atu o tēnei ko te ao Māori. Mā te Kura Kaupapa Māori ia e ārahi i roto i ēnei nekeneke tae noa ki tōna kura whakamutunga, arā, ki te ao whanui me ōna āhuatanga katoa.

4.2 Kia kaua te tamaiti e herea ki te ao kōhatu. Kia wātea hoki ia ki te kapo mai i ngā painga, i ngā māramatanga katoa o te ao whānui.

4.3 Haunga tērā, ko te timatanga tika mōna, ko te whai haere tonu i ngā kōrero tuku iho a ngā mātua tupuna e pā ana ki te timatanga o te taiao.

4.4 Kia whai koha ngā tamariki ki a Papatūnānuku rāua ko Ranginui me a rāua tamariki e tiaki nei i te hā o ngā moana, o te whenua, o te rangi me o rātau āhuatanga katoa.

4.5 Kia tupu te mīharo o ngā tamariki ki ngā mea ora, ki ngā mea tupu katoa. Kia kaua e tūkinotia.

4.6 Kia tupu ngā tamariki hei kaitiaki i ngā painga huhua o te whenua, o te moana, o ngā ngāhere. Kia mau hoki ki ngā ture tuku iho a ngā mātua tupuna, e pā ana ki te moana, ki te whenua, ki ngā ngāhere.

4.7 Kia whāia anō e ngā tamariki ngā ture o te ao, otirā ngā putaiao e pā ana ki te moana, ki te whenua, ki te rangi, ki ngā mahi tātaitai hoki.