Ngā Iwi

Ko te wāhanga tuatoru ko Ngā Iwi. Katoa ngā tamariki Māori e hono ana ki te maha o ngā iwi. Kāore te nuinga o rātau i te noho ki ō rātau wā kāinga. Ko te nuinga, e noho ana ki ngā taone. Nā reira, me mātua hono te kura i ngā tamariki ki ō rātau iwi. Koia he tūāpapatanga mō te marautanga o te kura. Mā te aro ki ngā iwi, ka aro ki te ao Māori, ki te orokohanga mai o ngā tūāhuatanga Māori. Ko te whānau o te tamaiti te tīmatanga o te poipoi, ā, me mātua rongo te tamaiti i te mana o te whānau – i roto i ngā whakahaere, i roto i te mahinga ngātahitanga o te whānau o te tamaiti me ngā pouako.

Te piko o te māhuri. Tērā te tupu o te rākau.

Ngā Iwi

3.1 Mō te nuinga o ngā tamariki, tokomaha ngā iwi. Tērā pea mō ētahi, kotahi te iwi. Ko te mea nui kia mōhio ngā tamariki ki o rātou ake iwi, hapū, whānau hoki. Tua atu o tērā kia mōhio hoki ki te katoa o ngā iwi tae noa ki a Tauiwi.

3.2 Nō reira, he mahi nui tērā te whai haere i ngā whakapapa hei here i ngā tamariki ki o rātou ake whānau, hapū, iwi, mātua tupuna hoki. Tua atu o tēnei ko te mōhio ki ngā tūhonohono ki ētahi atu o ngā iwi.

3.3 E tika ana kia tū whakahīhī te tamaiti i roto i tōna ake iwi, engari kia whai koha anō ki ngā iwi katoa.

3.4 Kia mōhio ngā tamariki ki ngā rohe, ki ngā waka, ki ngā kōrero neherā, ki ngā pūrākau, ki ngā pakiwaitara, ki ngā tikanga, ki ngā waiata, ki ngā āhuatanga katoa o tōna ake iwi. Kia mōhio anō ki ngā āhuatanga katoa e pā ana ki ērā atu o ngā iwi tae noa ki ētahi o ngā iwi o tāwāhi.

3.5 Me whai haere anō hoki ngā tamariki i ngā āhuatanga whānui e pā ana ki o rātou iwi tae noa ki ēnei rā.

3.6 Mā te rongo ā te tamaiti ki te awhi, ki te arataki, ki te tautoko, ki ngā tohutohu ā te Whānau me tōna aroha hoki, e mau ai tōna piripono ki te Whānau. He mea hopu te nuinga o ēnei tūāhua. Nō reira, e tika ana kia piri tonu te Whānau ki ngā tamariki i roto o te kura, i roto i a rātou mahi hoki.

3.7 Kia rongo te tamaiti ki te rekareka o te Whānau mō āna mahi pai, ki te pāpouri hoki o te Whānau mō āna mahi hē. Ko tēnei te timatanga o te pupuri i te tamaiti ki te huarahi tika, me tōna tū pakari i roto i tōna iwi.

3.8 Kia kite ngā tamariki ko te Whānau tonu e whakahaere ana i te kura, ko te Whānau hoki e mahi ngātahi ana me ngā pouako, ka tupu ia me te mōhio ko te wairua me te mana Māori motuhake e kākahu ana i a ia me tōna kura.

3.9 Ehara i te mea mō ngā tamariki anake te kura. He mātauranga anō kei te kura mō ngā taipakeke, mō te katoa o te Whanau hoki mehemea ka hiahia whakatū wānanga rātou mō rātou.

3.10 Mō te whakaako pouako hou, ko te kura anō te wāhi tika hei timatanga mā rātou, kia riro anō mā te Whanau rātou e arataki i roto i te mahi whakatupu, whakaako tamariki.